Donostiako Udaleko Euskara Zerbitzuak 2003an jarri zuen abian Mugikirola! euskarazko kirol aldizkaria. Bederatzi urte horietan irakurleek, gazteek bereziki, kiroletako berriak euskaraz irakurtzeko ohitura hartzen joatea izan da komunikabide honen helburu nagusia. Egindako lanaren balorazioa positiboa izan arren, Mugikirola! webgunea eta aldizkaria, oraingoz, argitaratzen ez jarraitzea eta indarrak zein baliabideak beste egitasmoetan jartzea erabaki du Euskara Zerbitzuak.

Donostiako Udaleko Euskara Zerbitzua

Añorga, Lengokoak, Herrerako Sporting eta Vasconia taldeek Antiguokoren aurka gauzatzen ari ziren boikota bertan behera utzi dute. Donostialdeko klubetako, Realeko eta Gipuzkoako Futbol Federazioko ordezkariek bilera izan dute aste honetan eta gehiengoa jokalari gazteen talde batetik besterako igarotzea arautzearen alde agertu da, gehiegikeriak eta hainbat talde erabat kaltetzea saihesteko.

Larunbatean, urriak 20, Harria 100 ekimena egingo dute Donostian, harria eta harri-jasotzaileen azken ehun urtetako historia omentzeko. Herri kirol horri buruzko liburua aurkezteaz gain, musika, dantza eta kirola uztartuko dituen jaialdia egingo dute Victoria Eugenia Antzokian. Eguerdi partean, berriz, bazkaria egingo dute Manteo kiroldegian.

Txirrindulari esanguratsua izan zen Jacques Anquetil frantziarra 1960ko hamarkadan eta Donostian bizi izan zuen bere ibilbideko unerik gogorrenetako bat. Jazoera hori azaltzen du, besteak beste, Raul Perez kazetari donostiarrak argitaratu berri duen biografian. Txomin Perurenak eta Luis Otaño txirrindulari ohiek idatzi dituzte hitzaurrea eta epilogoa, hurrenez hurren.

Duela hilabete batzuk iragarritako boikota betez, Añorga futbol taldeko ohorezko kadete mailako jokalariak ez ziren agertu asteburuan Antiguokoren aurka zuten partidara. Ondorioz, Añorga taldea zigortu du Gipuzkoako Futbol Federazioak eta partida galdutzat eman dio 3-0eko emaitzarekin.

Donostia Kirolak hirian kirola bultzatzea asmo duten erakunde eta klubei diru laguntzak emango dizkie, urteroko gisan. Aurten 740.000 euro bideratuko ditu laguntza horietara eta hiru kirol esparru lagunduko ditu: eskola kirola, kirol elkarteak eta izaera bereziko jarduerak. Eskariak urriaren 19a baino lehen egin beharko dira.

Urriaren 27an, Pasealeku Berrian, arrantzako Federazio Kopa jokatuko da kortxo modalitatean.

Donostia Kirolakek plan estrategiko berria prestatu du eta bertan hainbat punturi eman dio garrantzia, hala nola: hiri guztian zehar kirola egiteko hainbat zirkuitu prestatuko dituzte herritarrak kirola egitera animatzeko; kirol txartela sustatuko da eta ekimen bereziak antolatuko dira hirian, adibidez, 2015ean jokatuko den beteranoen errugbi txapelketa.

Pasa den asteburuan, irailaren 29an eta 30ean, jokatu zen Zurriola hondartzan Euskal Bodyboard Zirkuituaren bigarren jardunaldia. Open mailan Jose Ramon Martinez donostiarra izan zen irabazlea eta bere atzetik sailkatu ziren Aritz Larrinaga eta Antonio Ortiz.

Bera Bera Eskubaloiak espero zuena baino ibilbide laburragoa egin du Txapeldunen Ligan. Danimarkan poloniarren aurka jokatu zuen lehenengo partida galdu ostean Txapeldunen Ligan jokatzen jarraitzeko aukerak amaitu ziren.

Realak eta Athleticek hilaren 29an 20:00etan jokatuko duten partidarako sarrerak gaur jarriko dira salgai.

Bera Bera Eskubaloi taldeak asteburuan Danimarkan jokatuko du Txapeldunen Ligako lehenengo partida. Jokalariak baikor daude eta une historiko honi gogoz erantzuteko prest.

Realak bere ahalegina eta azken urteotako lana aitortu nahi die Olinpiar zein Paralinpiar Jokoetan parte hartu duten kirolari gipuzkoarrei. Hori dela eta, omenaldia egingo die irailaren 29an, 20:00ak aldean, Realak eta Athletic-ek Anoetan jokatuko duten norgehiagokaren hasieran. Kirolariak bi taldeetako jokalariekin batera egongo dira berdegunean eta ohorezko sakea egingo dute zaletuz beteta egotea espero den estadioan.

Aurreko denboraldian Lagun Aro Gipuzkoa Basket taldeko bazkide izandakoen %96k berritu du txartela. Hala ere, talde donostiarrak jarraitzaile gehiagorengana heldu nahi du eta bazkide berrien kanpaina jarri du martxan. Iraileko BEZaren igoera alde batera utzita, iazko prezioak mantendu ditu. Gainera, beste zaletu bat erakartzen duen bazkide bakoitzak %5eko deskontua izango du bere abonamenduan.

Donostiako Udal Gobernuak ostiralean Amarako Plan Orokorreko aldaketak onartuko dituela iragarri du. Horrek Anoeta estadioa birmoldatu ahal izatea eragingo du, proposamenak aurrez beste izapide batzuk igaro beharko baditu ere. Hala ere, egungo egitasmoak hainbat aldaketa ditu aurreko Udal Gobernuak Realarekin adostutakoarekin alderatuta, besteak beste, lurzoruak Udalarena izaten jarraituko du eta dorreak talde txuri urdinak proposatutakoak baino baxuagoak izango dira.

Luzea da Realeko belar hockey taldearen ibilbidea, 1930eko hamarkadan jokatu baitzuen lehen emakume taldeak klubaren izenean. Urte luzez ez zen talderik izan eta 1970eko hamarkadan berreskuratu zuten. Egun, maila goreneko taldeekin batera lehiatzen du. Maila horretara heltzeko harrobia lantzea du xede Realak, eta erronka horri helduko dio taldeak datorren astetik aurrera, 8 eta 12 urte bitarteko neskentzako eskola jarriko baitu martxan.

Datozen bi asteburuetan, irailaren 2an eta 9an, jokatuko dituzte Kontxako Banderako bi estropadak. Emakumeak zein gizonak lehiatuko dira bi igandeetan, eta aurtengo berrikuntza gisa, bi kategoriek egun berean jokatuko dute sailkatze estropada. Ostegunean, abuztuak 30, izango dira sailkapen estropadak: 17:30ean emakumeena eta 18:00etan gizonena.

Donostiarren arteko kirol lehia izan zen atzo, abuztuak 23, ikusgai Azpeitian, Realak eta Añorgak Emakumezkoen Euskal Herriko II. Futbol Kopako finalerdia jokatu baitzuten. Talde txuri-urdina 2-1 gailendu zen, eta ondorioz, Kopako finala jokatuko du igandean Beasaingo Loinaz futbol zelaian. Herenegun Lagunaki 5-0 irabazi zion Athletic izango du aurrean Realak.

Azken urteotan bezala, Egia Kirol Elkarteak Eskubaloiko Nazioarteko Torneoa antolatu du aurten ere. 18. edizioa izango da aurtengoa eta datorren astean, abuztuaren 30etik irailaren 1era, jokatuko da. Zortzi taldek hartuko dute parte, tartean Bera Bera eta Egia donostiarrek. Aurreikuspenen arabera, Montpellier, Frantziako ligako eta kopako irabazlea, izango da torneoko talderik indartsuena.

2012/2013 denboraldiaren atarian, kirolarientzako eskaintza berria prestatu du KirolPsikologia egitasmoak. Prestakuntza psikologikoan laguntzeko kirolarientzako eta entrenatzaileentzako #KPtailerrak emango ditu urtean zehar eta tailerren lehen saioak, #KPgosaria izenarekin eskainiko direnak, abuztuaren amaieran izango dira. Kirolarientzako ikastaroa abuztuaren 27an eskainiko da eta entrenatzaileentzakoa, berriz, abuztuaren 28an.